IT Park Uzbekistan резидентларга ёрдам бериш мақсадида “Local2Global” дастурини ишга туширди
![IT Park Uzbekistan резидентларга ёрдам бериш мақсадида “Local2Global” дастурини ишга туширди](https://ict.xabar.uz/static/crop/1/9/920__95_191205928.jpg)
Хорижий корхоналар томонидан Ўзбекистон компанияларига бўлган қизиқиш жадал ўсиб бормоқда “Global Business Services Forum” доирасида бўлиб ўтган "Tech.Expo" кўргазмасида резидентларимизнинг муваффақияти бунинг тасдиғидир: 30 нафар иштирокчи хорижий меҳмонлар билан икки томонлама келишувлар ва қўшма лойиҳаларни амалга ошириш бўйича 60 дан ортиқ музокаралар ўтказдилар.
Бошқа мамлакатлар компаниялари билан ҳамкорлик алоқаларини кенгайтириш ва экспорт салоҳиятини ошириш мақсадида IT Park Uzbekistan ўз резидентларига фойдали шартномалар тузиш ва чет элда АйТи ва autsorsing хизматларини кўрсатишда фаол кўмаклашишга тайёр.
Япония ва Кореяга йўналтирилган дастлабки икки гуруҳ аллақачон 25 нафар иштирокчини жалб этди. Улар учун IT Park Uzbekistan жамоаси 2 ой давом этадиган экспортга чиқиш бўйича махсус дастур ташкил қилди. Дастур компания портфолиоси ва визуал элементларини тайёрлаш, рақамли платформаларда маркетинг тарғиботи ва резидент компаниялар ходимлари учун тренинглар ўтказишда ёрдам беришни ўз ичига олади.
Бундан ташқари, иштирокчиларга хорижий саёҳатларни ташкил этишда ва мақсадли мамлакатларнинг саноат кўргазмалари ҳамда конференцияларида қатнашишда ёрдам кўрсатилади, бу ерда резидентлар буюртмачи компаниялар билан ишбилармонлик алоқаларини ва ҳамкорлик муносабатларини ўрнатиш имкониятига эга бўладилар.
Дастур муваффақиятли якунлангандан сўнг, компанияларга бозорни ўрганиш ва потенциал мижозлар билан учрашувлар ўтказиш мақсадида мос равишда Япония ва Кореяга ташриф уюштирилади.
“Local2Global” дастури доирасида резидент-иштирокчиларга молиявий кўмак ҳам берилади — IT Park Uzbekistan компанияларнинг қизиқишини рағбатлантириш мақсадида қуйидаги харажатларнинг 50 фоизигача қоплаб беради:
- таниқликни ошириш ёки мутахассислардан таълим олиш;
- маҳаллий ходимлар ва уларнинг фаолияти билан танишиш мақсадида хорижий ҳамкор компанияларнинг Ўзбекистонга ташрифини ташкил этиш;
- нетворкингни йўлга қўйиш ва йирик компаниялар тажрибасини ўзлаштириш мақсадида халқаро тадбирлар ва конференцияларда иштирок этиш;
- экспорт соҳасидаги маслаҳатчилар хизматларига сарфланадиган харажатлар.
Таъкидлаш жоизки, “Local2Global” дастури иштирокчилари учун экспортни ривожлантириш режаси қўйилади.
Дастурда иштирок этиш учун резидентлар my.it-park.uz кабинетида шаклни тўлдириши лозим.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter