Xitoyda OnePlus 12 flagman smartfonining rasmiy taqdimoti bo‘lib o‘tdi.

OnePlus 12 smartfonida 6,82 dyuymli qavariq AMOLED LTPO displey (3168 × 1440 piksel) o‘rnatilgan. Ekran moslashuvchan yangilanish chastotasi (BOE tizimi)ga ega bo‘lib, 120 Gs.gachani tashkil etadi.

Displey mexanik shikastlanishlardan  Gorilla Glass Victus 2 shishasi yordamida himoyalangan. Smartfon korpusining ort qismi ham shu shisha bilan qoplangan, smartfon romi alyuminiydan ishlangan. Ekran tepa qismidagi tirqishda 32 Mp selfi-kamera (f/2.4) joylashgan. U bilan 4K formatli videoni 30 kadr/soniyada olsa bo‘ladi.

Asosiy kamera 50 MP sensor (Sony Lytia-808 (f/1.6)dan iborat. Kameralar majmuasi teleob’yektiv (f/2.6) va yirik formatli 64 Mp matritsa (OmniVision OV64B) bilan to‘ldirilgan bo‘lib, periskopik linzalar tizimi ostida joylashgan, 3 karra optik zumni qo‘llaydi. Uchinchi kamera ham bor — bu keng burchakli modul (f/2.2) bo‘lib, 48 Mp Sony IMX581. Smartfon soniyasiga 24 kadr tezlikda 8K formatli video olish imkonini beradi, asosiy kamerada 4K videoni soniyasiga 60 kadrgacha yoki 1080p videoni soniyasiga 240 kadrgacha tezlikda olish mumkin. Auto HDR, gyro-EIS va Dolby Vision texnologiyalari tatbiq etilgan.

OnePlus 12 flagmanining apparat asosini eng ilg‘or — 8 yadroli Qualcomm Snapdragon 8 Gen 3 protsessori tashkil etadi.

Smartfon 12, 16 va 24 Gb operativ xotira, 256, 512 Gb va 1 Tb ichki xotira variantlarida taqdim etiladi.

Flagman 5400 mAs sig‘imli akkumulyatordan kuch oladi. Quvvatlash tezligi simlisida — 100 Vt, simsizida — 50 Vt gacha, teskari simsiz quvvatlash esa 10 Vt gachani tashkil etadi.

Simli bog‘lanish uchun USB Type-C interfeys, simsiz ulanish uchun Wi-Fi 7 va Bluetooth 5.4 modullari ko‘zda tutilgan.

Smartfon Android 14 platformasida (Xitoy bozorida ColorOS 14.0 foydalanuvchi interfeysi bilan), xalqaro bozorda (2024 yildan sotuvi boshlanadi) OxygenOS 14 interfeysi bilan ishlaydi.

Xitoydagi narxi:

• 12/256 Gb — $607;
• 16/512 Gb — $677;
• 16 Gb/1 Tb — $748;
• 24 Gb/1 Tb — $818.