Hindiston hukumati ikkinchi kosmodromni qurishga kirishadi — u kichik yo‘ldoshlarni orbitaga olib chiqishga mo‘ljallangan.

Yangi obyekt mamlakat janubidagi Tamil Nadu shtatining Kulasekarapattinam shahri yaqinida, 9 kvadrat kilometr maydonda joylashadi, bu haqda Deccan Herald gazetasi xabar berdi.

Loyiha qiymati qariyb $115 mln bo‘lib, poydevoriga birinchi toshni qo‘yish marosimi 28 fevralga mo‘ljallangan. Marosimda Hindiston bosh vaziri Narendra Modi qatnashishi kutilyapti.

Ekspertlarga ko‘ra, bu yerdan uchirilgan yo‘ldoshlar bevosita janubga yo‘naltirilgani uchun, yangi kosmodrom yonilg‘ini tejash imkonini beradi. Hindistonning Bengal ko‘rfazidagi eski kosmodromidan esa yo‘ldoshlar, Shri-Lanka osmonidan uchib o‘tmaslik uchun, janubi-sharqqa yo‘naltirilar, so‘ngra Janubiy qutbga tomon keskin burilishni amalga oshirar edi (xaritaga qarang).

Shtat hukumati fan-texnika va kostruktorlik kompaniyalarini jalb etish maqsadida, kosmodrom atrofida fazoviy sanoat parkini ham bunyod etmoqchi.