O‘zbekistonda global maqsadlarga ega bo‘lgan texnologik startaplar soni tobora ortib bormoqda. kpi.com esa Toshkentda yaratilib, xalqaro biznes darajasiga ko‘tarilgan muvaffaqiyatning yorqin namunasidir.

Loyiha asoschisi Muzaffar Karabayev “Shell” kompaniyasida ishlash va Oksfordda ta’lim olishdan tortib, o‘z IT jamoasini tuzishgacha bo‘lgan yo‘lni bosib o‘tdi.

IT va autsorsing loyihalaridagi faoliyatim 2000 yillarning boshida boshlangan, deya o‘z hikoyasini boshladi, bugungi qahramonimiz.

Mening dastlabki loyihalarim — "Uzreport.com” va "Uzjobs” — 1999 yilda “Yahoo” kabi platformalar boshlab bergan raqamli inqilobdan ilhomlangan edi. Tadbirkorlikka bo‘lgan ishtiyoqim esa Oksford universitetida MBA dasturida tahsil olayotgan paytim yanada kuchaydi.

O‘sha yerda kursdoshlarimdan biri avtomobil sanoatida firibgarlikni aniqlashga mo‘ljallangan innovatsion g‘oyani taqdim etdi, keyinchalik u "Contego.com” nomi bilan mashhur bo‘ldi.    

Toshkentdagi jamoam birinchi MVPni ishlab chiqdi. Bu mening texnologik startaplar va tadbirkorlik olamiga kirib borishimning chinakam boshlanishi bo‘ldi.

O‘sha vaqtga kelib, men Buyuk Britaniya uchun autsorsing loyihalari ustida ishlaydigan 30 nafar dasturchidan iborat jamoaga ega edim, bu esa barqaror daromad manbaini ta’minladi.

Bu menga ishonch va moliyaviy tayanch berdi, shuningdek, doimiy ish joyimni tark etib, o‘zimni to‘liq tadbirkorlikka bag‘ishlash uchun imkon yaratdi.

kpi.com g‘oyasi 2008 yilda paydo bo‘ldi va dastlab mening onlayn so‘rovlar bilan bog‘liq avvalgi tajribam asosida ishlab chiqilgan 360 darajali baholash vositasi sifatida mo‘ljallangan edi.    

“Shell” kompaniyasidagi ish tajribam, ayniqsa M&A bo‘limidagi faoliyatim hayotimda burilish nuqtasi bo‘ldi. Bu menga investitsiyalarni baholash, startaplarni moliyalashtirish va operatsion strategiyalarni shakllantirish bo‘yicha chuqur bilim berdi.

Fintech startaplarini baholovchi tahlilchi sifatidagi vazifam tadbirkorlikka bo‘lgan qiziqishimni sezilarli darajada oshirdi.

Bundan tashqari, “Shell” mening Oksforddagi MBA dasturida tahsil olishimni moliyalashtirdi, bu esa menga aloqalar o‘rnatish va mijozlarni topish uchun yangi imkoniyatlar yaratdi.

“Shell” kompaniyasidan ketish oson bo‘lmadi, biroq tadbirkorlikka bo‘lgan ishtiyoqim ustun keldi. Autsorsing shartnomalari orqali shakllangan mijozlar bazamiz tufayli tadbirkorlikka ishonch bilan qadam qo‘ydim va bu qarorimdan hanuz faxrlanaman.

kpi.com uchun ilk jamoa mening o‘sha paytdagi kompaniyam — “Datasite Technology” tarkibidagi tajribali 30 nafar dasturchidan shakllantirildi.

Biz besh nafar iste’dodli mutaxassisni tanlab, ularni mahsulot yadrosi ustida ishlashga yo‘naltirdik va 2011 yilga kelib, bu guruhni asta-sekin o‘n kishigacha kengaytirdik.

2012 yilda $1,5 million investitsiyadan voz kechish men uchun kamtarlik va strategiya borasida muhim saboq bo‘ldi.

Avvaliga mustaqil ravishda kengayishimiz mumkin deb o‘ylagandim, biroq keyinchalik tashqi investorlarning qadrini angladim.

Ularning aloqalari, tajribasi va faol marketingga sarmoya kiritish hamda bozorni tezda egallab olish imkonini beradigan kapitali juda muhimligini tushundim.

Bugungi kunda ushbu investitsiyani qabul qilish kpi.comning o‘sishini sezilarli darajada tezlashtirgan bo‘lardi deb hisoblayman. Bu tajriba menga hamkorlik va sheriklar bilan ochiq munosabatda bo‘lishning muhimligini boshidanoq, hatto MVP bosqichida ham o‘rgatdi.   

Men jamoalarga boshqaruvni aniq o‘sish maqsadlarisiz topshirdim. Natijada, asoschining faol ishtiroki ushbu bosqichda nihoyatda muhim ekanini angladim.

Biroq kpi.comning mustahkam poydevori menga boshqa loyihalarni, masalan, “Souq.com” tomonidan muvaffaqiyatli investitsiya qilingan “Wing.ae” startapini yaratish imkonini berdi.

Bizning biznes modelimizning asosi — shaxsiylashtirilgan qo‘llab-quvvatlash, ayniqsa bu madaniy jihatdan muhim bo‘lgan bozorlarda katta ahamiyat kasb etadi.

Menimcha, O‘zbekiston va bir qator Afrika mamlakatlari ham biz yaqin kelajakda kirishni rejalashtirgan bozorlardir.

Biz mijozlarning kutilmalariga mos kelish maqsadida inson omilini sun’iy intellekt texnologiyalari bilan uyg‘unlashtiramiz, bu esa ularning sodiqligini yanada mustahkamlashga yordam beradi.  

O‘zbekiston hukumati ko‘rsatayotgan qo‘llab-quvvatlash, shuningdek, Prezident Shavkat Mirziyoyev va Raqamli texnologiyalar vaziri Sherzod Shermatovning IT Park orqali ilgari surayotgan tashabbuslari tufayli biz mahalliy bozorga faol kirib kelmoqdamiz. Raqamlashtirish jarayonini tezlashtirish maqsadida kompaniyalarga 75 foizgacha chegirmalar taklif etmoqdamiz, shuningdek, demo-versiyalarni sinab ko‘rish va bepul foydalanishni boshlash imkoniyati ham mavjud.

Bugungi kunda O‘zbekistonda 100 dan ortiq kompaniya bizning mahsulotimizdan foydalanmoqda.

Bizning asosiy maqsadimiz — raqamli transformatsiyani qo‘llab-quvvatlash va bozordagi ishtirokimizni kengaytirish.

Shu bilan birga, yurtimizdagi iqtidorli yoshlarni rivojlantirish maqsadida oliy o‘quv yurtlarida hakatonlar va ERP loyihalari uchun laboratoriyalar tashkil etishni rejalashtiryapmiz.

Hozirda “New Uzbekistan University” hamda yaqinda ochilgan “American University in Tashkent” bilan muzokaralar olib boryapmiz.

Mahsulot ishlab chiqishning har bir bosqichida sun’iy intellektdan foydalanish va uni kundalik ish jarayonlariga integratsiya qilish muhim. Kim bu texnologiyadan to‘g‘ri foydalansa, bozorga albatta ajralib turadi!

Bugungi kunda kpi.com IT Park Uzbekistan ko‘magida mahalliy kompaniyalarga zamonaviy ERP yechimlarini joriy etishga yordam bermoqda, uning asoschisi esa mintaqaviy IT hablarni rivojlantirishga sarmoya kiritmoqda.

Xuddi shu muvaffaqiyatni takrorlamoqchimisiz? Kichik g‘oyadan boshlang, ammo global miqyosda o‘ylang — va strategiyani o‘zgartirishdan qo‘rqmang!

Sizda startap g‘oyasi bormi yoki yordamga muhtoj bo‘lgan startapga egamisiz? StartupBase platformasi orqali ariza topshiring.