Қулликдан таниқли олимликкача йўлни босиб ўтган қадимги юнон файласуфи-стоик Эпиктет шундай деган экан: “Кишини ҳақиқий муаммолардан ҳам кўра, ўша муаммолар ҳақидаги тасаввуридаги хавотирлар кўпроқ ташвишга солади”.

Бу йилги катта раҳбарларнинг интервюларидан иборат New York Times Dealbook саммитида Женсен Ҳуанг доим компанияси банкротга учрашидан қўрқиб яшашини яширмади. “Бошқалар мени бизнесимдан чиқариб юборади деб ўйламайман — бунга ишончим комил. Аммо маълум мақсад йўлида шижоат баробарида, худди бу сўнгги имконият каби интиламиз — мен шундай шароитда ишлаб ўрганганман”, — деди у.

Бозор капитализацияси $1,180 триллионни ташкил этиб, жаҳоннинг олтинчи қиммат компаниясига айланган, охирги уч йил давомида икки баравар катталашган NVIDIA бир соат ичида инқирозга учрашини тасаввур қилиш қийин, албатта. Женсен Ҳуанг 1993 йилда компанияга Крис Малаховски (ҳозирда NVIDIA ишлаб чиқариш ва эксплуатация бўйича катта вице-президенти) ҳамда Кёртис Прием билан биргаликда асос солган ва ўшандан буён раҳбарлик қилмоқда.

“Ҳалокат ёқасида туриб яшаш менга ёқади”, — деди Ҳуанг ва бундай ҳолатлар унга рағбат ҳамда кўзланган мақсадларга эришиш учун куч беришини тушунтиради.

NVIDIA компаниясининг график процессорлар, хусусан, сунъий интеллект тизимлари учун график тезлаткичлар соҳасида етакчилиги нуқта назаридан, Женсен Ҳуангнинг фикрлари шунчаки маркетинг ёндашуви бўлиши мумкин ёки уч чиндан ҳам фирибгар синдромига чалинган. Бу — руҳий ҳолат бўлиб, унда киши эришилган ютуқларини ҳурматга лойиқ деб ўйламайди ёки ўз муваффақиятларини ерга уришга интилади. Ер юзидаги муваффақиятли кишилардан ҳар беш нафаридан икки нафари касаллик саналмайдиган ушбу синдромга чалинганини олимлар таъкидлашади. Ҳатто буюк Алберт Эйнштейн: “Ҳаётий фаолиятимни қуршаб олган ортиқча иззат-ҳурмат туфайли ноўнғайликдан қийналаман. Беихтиёр ўзимни фирибгардек ҳис этишни бошлайман”, деб нолиган экан.

Юқоридаги интервюсида Ҳуанг АҚШ яримўтказгичлар саноатининг тўлиқ мустақиллиги истиқболларига ҳам тўхталди: “Етказиб бериш занжиридаги тўлиқ мустақиллик яқин ўн ёки йигирма йилларда ҳал бўладиган вазифа эмас”. Чунки, унинг изоҳлашича, NVIDIAнинг айрим тизимлари 32 000 тагача қисмлардан иборат. Буларни ташкил этувчи график процессорлар, босма платалар, хотира микросхемалари, электрон унсурлар, радиаторлар, вентиляторлар ва ҳоказоларни ишлаб чиқариш билан эса жаҳоннинг турли нуқталарига сочилиб кетган жуда кўплаб компаниялар шуғулланади.