Мамлакатнинг энг йирик қидирув провайдери бўлган Хитойнинг Baidu компанияси ўзининг Ernie номли чатботи кенг омма учун очиқ бўлганини эълон қилди.

Эслатиб ўтамиз, Хитойнинг ChatGPTга қарши чатботи шу йилнинг март ойида эълон қилинган эди. Аввалига чатботнинг синов версияси чекланган фойдаланувчилар гуруҳигагина синовдан ўтказиш учун тақдим этилди.

Чунки хитойлик регуляторлар бундай хизматлар дастлаб кўпчилик томонидан маъқуллангандан кейингина оммавий равишда фойдаланишга топширилиши мумкинлигини айтишган.

Айтишларича, сунъий интеллект томонидан яратилган контент асосий социалистик қадриятларни ўзида мужассам этган бўлиши керак.

Шунингдек, миллий хавфсизликка таҳдид солмаслиги, терроризм ва зўравонлик ташвиқоти, порнография, ёлғон ва зарарли маълумотлардан ҳоли бўлиши лозим.

Ernie чатботини Baidu веб сайтидан ёки мобил иловасидан юклаб олишингиз мумкин. Ишлаб чиқарувчиларнинг айтишича, ушбу хизматдан эндиликда барча тўлиқ фойдаланиши мумкин.

Ҳозиргача Хитой регуляторлари сунъий интеллектга асосланган чатботларни оммавий ишга тушириш учун жами 11 та рухсатнома берди.

Айтиш жоизки, Baiduдан ташқари, Хитойнинг SenseTime, Baichuan Intelligent Technology ва Zhipu компаниялари ҳам ана шундай чатботларни кенг омма эътиборига ҳавола этишган.