1989 йилда суратга олинган “Йўл ёқасидаги уй” (“Road House”) жанговар филмининг ремейки чиқишидан олдин ҳуқуқий муаммоларга дуч келди. Сценарий муаллифи Р.Ленс Ҳилл Amazon Studios ва MGM Studiosни муаллифлик ҳуқуқини бузганликда ва актёрларнинг “овозларини такрорлаш” учун сунъий интеллектдан фойдаланганликда айблаб, судга берди.

Бош ролни Патрик Суэйзи ўйнаган “Йўл ёқасидаги уй” асл сценарийсини ёзган Ҳилл 2021 йил ноябрида ўз сценарийси ҳуқуқларини қайтариб олиш учун петиция топширганини айтади. MGMни сотиб олиш натижасида Amazon Studiosга тегишли бўлган ҳуқуқлар 2023 йил ноябрида тугаши керак эди. Даъвога кўра, Ҳилл бу ҳолатда ҳуқуқлар унга қайтишини таъкидлайди.

Ҳиллнинг таъкидлашича, Amazon муаллифлик ҳуқуқининг амал қилиш муддати тугаши билан дуч келган бўлиб, белгиланган муддатни бажариш учун ремейкни ишлаб чиқаришга шошилди. Бироқ лойиҳага ўша пайтда давом этаётган актёрларнинг иш ташлаши тўсқинлик қилгани айтилмоқда.

Даъводаги асосий айблов шундан иборатки, Amazon иш ташлашни четлаб ўтиш ва муаллифлик ҳуқуқи муддати тугашидан олдин филмни якунлаш мақсадида ремейкдаги актёрларнинг овозларини такрорлаш учун сунъий интеллект технологиясидан фойдаланган. Ушбу амалиёт, даъво аризасида айтилишича, SAG-AFTRA актёрлар уюшмаси ва Amazon каби йирик студиялар ўртасидаги келишувни бузади.