Шундай кишилар борки, замонавий технологиялардан унумли фойдаланган ҳолда кўплаб инсонларнинг мушкулини осон қила олади.

Ана шундай қаҳрамонлардан бири дунёдаги энг баланд бўйли дастурчи аёл Румейса Гелгидир.

Нақ 5 та рекорд соҳибаси бўлган туркиялик бу аёл Уивер синдроми деб номланувчи камёб генетик мутация билан дунёга келган.

Бу дард тананинг тез ўсишига олиб келади ва кўпинча суякларни заифлаштириб, бўғимлар ҳаракатини ҳам чеклаб қўяди.

У 5 ёшга тўлар-тўлмас иккита оғир жарроҳлик амалиётини бошидан кечиргач, илк бор қадам босишга муваффақ бўлган.

2014 йилда Румейса “Дунёдаги энг баланд бўйли ўсмир қиз”, деган номга сазовор бўлди.

2021 йил октябрь ойининг ўрталарида Гиннесснинг рекордлар китоби вакиллари ҳозирда яшаётган энг баланд бўйли аёл унвони бўйича жаҳон рекордини расман тасдиқлашди.

Бу эса ўша пайтда 24 ёшни қарши олган Румейса Гелгига насиб этди.

Румейса баланд бўйи ва соғлиғидаги муаммолар туфайли одатда ногиронлар аравачасида ҳаракатланади.

Шунга қарамай, у қатъиятли ва келажагини фақат ёрқин ранглардагина кўради.

“Ҳар қандай камчиликни фазилатга айлантириш мумкин. Шунинг учун ўзингизни қандай бўлсангиз, шундайлигича қабул қилинг. Ўз салоҳиятингизни рўёбга чиқариш учун қўлингиздан келганича ҳаракат қилинг”, – деди у Гиннесс нашрига берган интервюсида.

Румейсанинг энг катта орзуларидан бири рекорд ўрнатиш бўлган. Унинг учун рекордчи бўлиш ниҳоятда ёқимли.

Туркиялик Румейса Гелги бугунги кунда расман Ер юзидаги энг баланд бўйли аёл ҳисобланади.

Аммо яқинда унинг ҳаётида яна бир шахсий рекорд содир бўлди, яъни, у 25 йил ичида биринчи марта самолётда парвоз қилди. Бу ҳақда у ижтимоий тармоқдаги саҳифасида маълум қилди.

Румейсанинг Истанбулдан Сан-Францискога парвози 14 соат давом этди, деб ёзди Американинг Нью Йорк Пост нашри. Саёҳат қулай бўлиши учун Туркия ҳаво йўллари ходимлари олтита ўриндиқни махсус каравотга алмаштиришди.

Айтишларича, у АҚШга хизмат сафари учун борган. Маълумот учун: Гелги хоним айни дамда дастурий таъминот соҳасида ишлайди.

Шу боис ҳам ахборот технологияларидан унумли фойдаланишни яхши билади.

2021 йилда Туркияда содир бўлган йирик ёнғинлар пайтида у Instagramдаги профили орқали халқи учун ёрдам сўраб, хайрия ҳам ташкил қилган.

Кўриб турганингиздек, қаҳрамонимиз нафақат баланд бўй, балки бошқа одамларнинг муаммоларига бефарқ бўлмаган катта қалб соҳибаси ҳамдир.