Бугун, 29 ноябр куни Xiaomi компанияси Хитойда Redmi K70 смартфонлари туркумини тақдим этди. Ушбу тақдимот бўлиши ҳақида ўтган ҳафтада эълон қилинганди.

Янги туркум Redmi K70 Pro флагман модели, нимфлагман даражасидаги Redmi K70 ҳамда ўрта сегмент учун мўлжалланган Redmi K70E смартфонларидан иборат. Уларнинг барчаси Android базасидаги янги Xiaomi HyperOS операцион тизимида ишлайди.

Redmi K70 Pro ва Redmi K70

Redmi K70 Pro ҳамда Redmi K70 бир хил — 6,67 дюйм катталикдаги текис OLED-экранларга эга, 2K ечим (3200 × 1440 пиксел) қўлланилган. Ҳар икки смартфонда ўрнатилган бу экранлар TCL Huaxing билан ҳамкорликда ишлаб чиқарилган бўлиб, янгича C8 люминесцент ашё ишлатилганлиги сабабли ўта юқори ёрқинликни таъминлайди — 4000 кд/м2 гача. Экраннинг янгиланиш суръати — 120 Гц. Экран томонлари нисбати — 20:9, тиниқлик — 5 000 000:1.

Redmi K70 Pro флагман моделида 4 нанометрли 8 ядроли Snapdragon 8 Gen 3 процессори ўрнатилган, график тезлатгичи — Adreno 750. Ўз навбатида, Redmi K70 4 нанометрли 8 ядроли Snapdragon 8 Gen 2 процессорида ишлайди, бундаги график тезлатгичи ҳам эскироқ — Adreno 740.

Ҳар икки смартфон LPDDR5x-8533 тезкор хотирага эга. Redmi K70 да 12 ва 16 Гб кўзда тутилган бўлса, Redmi K70 Proда оператив хотира — 24 Гб гача. Маълумотларни сақлаш учун сиғими 256 Гб, 512 Гб ёки 1 Тб бўлган UFS 4.0 флеш-сақлагичлар ўрнатилган.

Фото ва видео олиш имкониятлари: ҳар икки смартфонда бош модулнинг асосий камераси 50 Мп сенсордан иборат (1/1,55″ ўлчамли Light Hunter 800, оптик ва электрон стабилизаторлар, f/1,6 диафрагма). Redmi K70 Pro флагманида бош модул, шунингдек,  12 Мп камера (OmniVision OV13B10 сенсори), кенгбурчакли оптика (120°),  f/2.2 диафрагма, қолаверса, 8K-видео олиш имконини берувчи 50 Мп телефотомодули (OmniVision OV50D40 сенсори) билан тўлдирилган. Селфи-камераси — 16 Мп.

Redmi K70 смартфони, юқорида айтилган 50 Мп камера (Light Fusion 800 сенсори)га қўшимча тарзда, кенг бурчакли 8 Мп камера (120°), f/2.2 диафрагма, макротасвирлар учун 2 Мп камера ((f/2.4)га эга. Селфи-камераси — 16 Мп.

Юқоридаги икки смартфонда экраности бармоқ сканерлари, USB Type-C портлари, Hi-Res ва Dolby Atmosни қўлловчи стереодинамикалар мавжуд.

Ҳар икки смартфонда аккумуляторларнинг сиғими — 5000 мАс. Юқори тезликда қувватлаш технологиясидан фойдаланилган — 120 Вт.

Redmi K70 смартфонида Wi-Fi 6, Bluetooth 5.2 симсиз алоқа адаптерлари, ИК-узатгич, 5G, NFC технологияси ишлайди. Redmi K70 Pro флагманида эса Wi-Fi 6E, Bluetooth 5.3 адаптерлари, ИК-узутгич, 5G ва NFC кўзда тутилган. Ҳар икки моделда янги Xiaomi HyperOS тизими татбиқ этилган.

Нархлар:

Redmi K70 Pro

• 12/256 Гб — 3299 юан ($465 атрофида);
• 24 Гб/1Тб — 4399 юан ($621 атрофида).

Redmi K70

• 12/256 Гб — 2499 юан ($352 атрофида);
• 16 Гб/1 Тб — 3399 юан ($480 атрофида).

Смартфонларга олдиндан буюртма бериш 29 ноябрдан, Хитойдаги сотувлар 1 декабрдан бошланади.

Шунингдек, икки хил рангли, эксклюзив дизайн ва индивидул совға қутили махсус Redmi K70 Pro Automobili Lamborghini SQUADRA CORSE смартфонлари чиқарилади. Фақат 24 Гб оператив хотира, 1 Тб ички хотирага эга ушбу смартфонлар ҳам тез орада сотувда пайдо бўлади.