Рақамли технологиялар вазири Шерзод Шерматов Навоий вилоятига хизмат сафари доирасида IT Parkнинг ҳудуддаги филиалига ташриф буюрди.

Мазкур ташриф давомида IT Park резидент корхоналари томонидан яратилган ва ижтимоий-иқтисодий аҳамиятга эга истиқболли стартап лойиҳалар тақдимоти ўтказилди.

Бу лойиҳалар аҳоли учун янги имкониятлар яратиш ва турли соҳаларда самарадорликни ошириш мақсадида ишлаб чиқилган.

SerBiz — Умматой Йўлдошева томонидан ишлаб чиқилган мазкур лойиҳа аҳоли бандлигини таъминлаш ва маиший ишлар учун керакли мутахассисларни топишда ёрдам берувчи ахборот тизимидир. Ушбу тизим аҳоли орасида юқори қизиқиш уйғотди ва бандлик масаласида муҳим ечим сифатида кўрилди.

Anoratalks — аёл ва қизлар учун мўлжалланган дастур ўз-ўзини ҳар томонлама ривожлантириш ҳамда турли саволларга жавоб олиш имкониятини беради.

Pos Eco System — ушбу лойиҳа савдо нуқталарини автоматлаштириш ва омборларда товарлар ҳисобини юритиш, шунингдек, мижозлар билан самарали алоқани таъминлаш имкониятларини яратади.

Тизимнинг тижорат соҳасидаги жараёнларни соддалаштиришга йўналтирилгани инвесторлар ва мутахассислар орасида катта қизиқиш уйғотди.

Студент бот – Талабаларга олий таълим муассасаларида жорий этилган ўқув тизимлари билан ишлашни осонлаштириш учун Тelegram бот орқали интеграция қилинган платформа. Мазкур тизим талабалар учун ўқув жараёнларини соддалаштириб, уларга қулайлик яратади.

Инстатека – Ипотека жараёнларини бошқаришда ишлаб чиқарувчи, мижоз вакили (риелтор) ва банк учун онлайн платформа бўлиб, CRM функциялари ёрдамида самарали алоқа ва битимларни бошқариш имконини беради.

Мазкур лойиҳа B2B форматида ишлаши ва ипотека жараёнларини рақамлаштиришга қаратилгани билан ажралиб туради.

Ташриф давомида Шерзод Шерматов ҳар бир лойиҳанинг ижтимоий ва иқтисодий аҳамиятига алоҳида тўхталиб, лойиҳа раҳбарларига қўшимча тавсиялар берди.

Ушбу стартаплар IT Park ва Навоий вилоятида инновацияларни ривожлантириш, янги иш ўринлари яратиш ва аҳолига қулайликлар тақдим этишда муҳим қадам эканлигини таъкидлади.