Малайзияга ташрифи доирасида Рақамли технологиялар вазири ўринбосари Жамол Махсудов “Canaan Communications” компанияси асосчиси Раҳул Чалам ва Бизнес операциялари директори Винод Прасад билан учрашди.

Учрашувда “Canaan Communications” компанияси фаолиятини янада кенгайтириш мақсадида Ўзбекистонда офисини очиш ва АйТи резиденти мақомини олиш имкониятлари муҳокама қилинди. Шунингдек, солиқ имтиёзлари, жумладан, “Zero Risk” дастури доирасида Ўзбекистонда алоқа марказини ташкил этиш масалаларига алоҳида эътибор қаратилди.

Бундан ташқари, Ўзбекистон делегацияси Малайзия компанияси вакилларини 24 июл куни Тошкент шаҳрида бўлиб ўтадиган “Global Business Services Forum” тадбирига таклиф қилди.

Маълумот учун: “Canaan Communications” – Малайзиядаги энг йирик аутсорсинг компанияси бўлиб, у мамлакатдаги ТОП 25 АйТи корхоналари рейтингига киритилган. Дастурий таъминотни ишлаб чиқиш, алоқа маркази хизматлари ва маркетингга ихтисослашган. Ҳозирда компанияда 250 дан ортиқ киши ишлайди ва Нью-Йорк, Лондон, Торонто ва Сиднейда офислари мавжуд.