Qo‘ng‘iroq qilib, o‘zini “Click operatori” deb tanishtirdi va...
Toshkent shahrining Uchtepa tumanida yashovchi 33 yoshli U.O. IIOga murojaat qilib, bank kartasidagi 600 000 so‘m pul noma’lum shaxs tomonidan firibgarlik yo‘li bilan o‘zlashtirilganini ma’lum qildi.
Tezkor-qidiruv xizmatining kiberxavfsizlik bo‘linmalari xodimlari tomonidan o‘tkazilgan tezkor-qidiruv tadbirlari natijasida mazkur jinoyatni sodir etgan shaxs — Toshkent shahrining Yunusobod tumanida yashovchi 20 yoshli K.G. aniqlandi.
Aytilishicha, K.G. jabrlanuvchi U.O.ning qo‘l telefoniga qo‘ng‘iroq qilib, o‘zini “Click operatori” sifatida tanishtiradi, SMS-xabarnoma yuborish orqali uning kartasi boshqaruv huquqini qo‘lga kiritadi va jami 600 000 so‘m pulni o‘ziga o‘tkazib olib, shaxsiy ehtiyojlari uchun ishlatib yuborgan.
Holat yuzasidan O‘zbekiston Respublikasi JKning 168-moddasi 3-qismi bilan jinoyat ishi qo‘zg‘atilib, K.G.ning sodir etilib, fosh etilmay qolgan boshqa shu turdagi jinoyatlarga aloqadorligini tekshirish maqsadida tergov, tezkor-qidiruv harakatlari davom ettirilmoqda.
Qonunga muvofiq, O‘zbekiston Respublikasi Jinoyat kodeksining 168-moddasi 3-qismidagi jinoiy xatti-harakatlar uchun 5 yildan 8 yilgacha ozodlikdan mahrum qilish jazosi nazarda tutilgan.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter