Xiaomi kompaniyasi yangi flagmani — Xiaomi 14 Ultra smartfonini rasman taqdim etdi. Bu smartfon Samsung Galaxy S24 Ultra, Oppo Find X7 Ultra va boshqa flagman kamerofonlarga raqib o‘laroq ko‘rilmoqda.

Flagmanlarga xos ravishda Xiaomi 14 Ultra bir kristalli Qualcomm Snapdragon 8 Gen 3 professoriga ishlaydi. Sovitish tizimi esa an’anaviy yechimlardan uch baravar samarador ekani aytilmoqda.

Akkumulyatori sig‘imi 5300 mAs (Xiaomi 13 Ultraga nisbatan 300 mAs yuqori), simli 90 Vt, simsiz 80 Vt tezkor quvvatlagich ishlatiladi. 

Xiaomi 14 Ultra navbatdagi marotaba yaxshilangan Leica kamerasiga ega bo‘lmoqda. Unda to‘rtta modul bo‘lib, hammasi 50 megapikselli. Asosiy sensor — Sony LYT-900, u bilan birga modulda Leica Summilux obyektivi ishlatiladi. Aytilishicha, uning yorug‘lik qamrovi  iPhone 15 Pro Max asosiy moduliga nisbatan 205 foiz yuqori.

Smartfonda Ultra Zoom texnologiyasi qo‘llanilgan, u 30 marta yaqinlashtirib foto olish imkonini beradi.

Kamerasi 4K videoni 120 k/s, 8K videoni 30 k/s tezlikda yozishga mo‘ljallangan.

Mish-mishlar oqlanmadi — hamma Xiaomi 14 Ultralarda ham titan rom ishlatilmadi — smartfonning yon romlari alyuminiydan, charm nusxasi berilgan ort korpusi keramikadan ishlangan. Faqat maxsus chiqarilgan Xiaomi 14 Ultra Titanium Special Edition smartfonlari romlarida titan ishlatilgan.

Smartfonning o‘lchamlari — 161,4 × 75,3 × 9,2 mm, og‘irligi — 224,4 gramm.

Xiaomi 14 Ultra ekrani — 6,73 dyuymli OLED (3200 × 1440 piksel, 120 Gs, 3000 kd/kv.m yorqinlik).

Xiaomi 14 Ultra — kompaniyaning yo‘ldoshli aloqa (ikki tomonlama)ni qo‘llovchi ilk smartfoni hisoblanadi.

Narxlari:

• 12/256 Gb — 905 dollar
• 16/512 Gb — 975 dollar
• 16 Gb /1 Tb — 1085 dollar

Xiaomi kompaniyasi, shuningdek, Xiaomi 14 Ultra Titanium Special Edition (titan romli) smartfoni, Xiaomi Pad 6S Pro 12.4 plansheti va Redmi Book Pro 16 2024 noutbuklarini taqdim etdi.