“O‘zbekkosmos” agentligi tashabbusi bilan joriy yilning 4–10-oktabr kunlari mamlakatimizda “Butunjahon kosmos haftaligi” tadbirlari bo‘lib o‘tadi.

BMT Bosh Assambleyasi tomonidan 1999-yilda imzolangan rezolyusiyaga muvofiq, har yili oktabr oyining dastlabki 10 kunligida dunyoning 100 ga yaqin davlatlari mazkur sanani keng nishonlashadi.   

“O‘zbekkosmos” agentligi ham “Butunjahon kosmos haftaligi” doirasida ko‘plab yirik loyihalarni amalga oshirmoqda. Xususan, 4–10-oktabr kunlari “Tashkent City Mall” markazida kosmos tarixiga bag‘ishlangan maxsus ko‘rgazma o‘z ishini boshlaydi. 

Qolaversa, bolajonlar uchun majmuadagi “Sky Park” tomonidan turli interaktiv shou o‘yinlar, tanlov va viktorinalar o‘tkaziladi. 

Shu bilan birgalikda 5–6-oktabr kunlari Toshkent shahridagi Turin Politexnika Universitetida “O‘zbekkosmos” agentligi va NASA hamkorligida tashkil etilayotgan yirik “NASA Space Apps Challenge 2024” xakatoni bo‘lib o‘tadi. Unda 200 nafardan ziyod yoshlar 40ga yaqin jamoalarga bo‘lingan holda o‘z loyihalarini ishlab chiqishadi. 

Shuningdek, butun Respublika bo‘yicha umumta’lim maktablari, akademik litsey va universitetlarda “Butunjahon kosmos haftaligi” mavzusiga bag‘ishlangan ochiq darslar, suhbatlar, taqdimotlar va boshqa qator loyihalar amalga oshirilishi rejalashtirilgan.