AKT haftaligi doirasida Raqamli texnologiyalar vaziri Sherzod Shermatov Comptia rahbariyatini qabul qildi.

Ushbu kompaniya IT sohasida mutaxassislarni sertifikatlash va o‘qitish bo‘yicha jahonda yetakchilardan hisoblanadi. Uchrashuvda IT-mehnat bozori ehtiyojlari asosida sohada kadrlar tayyorlash, xalqaro IT-sanoati uchun malaka standartlarini shakllantirish muhokama qilindi.

Raqamli texnologiyalar vaziri mamlakatdagi ta’lim dasturlari va IT sohasi talablari o‘rtasidagi tafovutni bartaraf etishda Comptia kabi ommabop tashkilotlar bilan hamkorlik qilishning strategik ahamiyatini ta’kidladi. Vazirlikning maqsadi – yoshlarimiz va ishchi kuchimizni ilg‘or bilim va sertifikatlar bilan ta’minlash, ularni nafaqat mahalliy bozorda, balki jahon miqyosida raqobatbardosh qilish ekanini qo‘shimcha qildi.

Raqamli texnologiyalarning jadal evolyusiyasi va malakali mutaxassislarga bo‘lgan ehtiyoj ortib borayotganini e’tirof etgan holda, ikki tomon ham O‘zbekiston ishchi kuchini kelajakdagi o‘zgarishlarga tayyorlash muhimligini ta’kidladilar. Muhokamalar yosh iqtidorlarni tez rivojlanayotgan IT sohasida muvaffaqiyatga erishish uchun zarur vositalar va malakalar bilan ta’minlash atrofida bo‘ldi. Comptianing global sertifikatlashtirish dasturlarini ishlab chiqish bo‘yicha katta tajribasi O‘zbekistonga o‘z ta’lim dasturlarini xalqaro tan olingan standartlarga moslashtirish uchun qimmatli imkoniyat yaratadi.

Ushbu tashabbus doirasida uchrashuvda tomonlar O‘zbekistondagi IT sohasiga xos malakaviy talablarni ishlab chiqish ham ko‘rib chiqildi. Mazkur standartlar Comptia tomonidan taqdim etilgan xalqaro sertifikatlarga mos keladi va O‘zbekistonning IT-mutaxassislari sohaning eng yuqori standartlariga javob berishini ta’minlaydi.

Raqamli texnologiyalar vazirligi va Comptia o‘rtasidagi hamkorlik O‘zbekistonda raqamli ekotizimni rivojlantirish, innovatsiyalarni qo‘llab-quvvatlash va mamlakat ishchi kuchi kelajagiga tayyor bo‘lishini ta’minlash yo‘lidagi muhim qadamdir.