WhatsApp ishlab chiquvchilari messenjerga foydalanuvchi profillarining skrinshotlarini yaratishni oldini oluvchi yangi funksiyani joriy qilishdi. Bu haqda WABetaInfo portali xabar berdi.

Hozircha yangilik faqat iPhone uchun WhatsAppning beta-versiyasida ishlaydi. Ilovaning ushbu versiyasi foydalanuvchilari boshqa birovning profilining skrinshotini olishga harakat qilganda, endi bu harakat taqiqlanganligi haqida ogohlantirishni ko‘rishadi.

Bu xususiyat boshqalarning profil suratlaridan kontaktlarini soxtalashtirish uchun foydalanadigan firibgarlarning keng tarqalgan amaliyotiga qarshi kurashish uchun mo‘ljallangan.  

Yangi funksiya skrinshot olish imkoniyatini bloklasa-da, u smartfon kamerasi yordamida bir qurilma ekranidan olingan suratlardan foydalanuvchi profillarini himoya qila olmaydi.

Yaqin kelajakda yangilik ilovaning barcha versiyalari va barcha qo‘llab-quvvatlanadigan platformalar uchun kengaytirilishi kutilmoqda, ammo funksiyani ishga tushirishning aniq vaqti oshkor qilinmadi.