17 январ куни Калифорния (АҚШ)да Galaxy Unpacked — Samsung компанияси ўз янги қурилмаларини тақдим этадиган анъанавий тадбир бўлиб ўтди. Унда Samsung янги Galaxy S24 флагман смартфонини, шунингдек, сунъий интеллект (AI) технологиясини қўлловчи  S24+ ва S24 Ultra моделларини тақдим этди.

Европа бозорида Galaxy S24 ва Galaxy S24+ нархи $800 ва $1000 дан бошланади, илк марта титан корпусда чиққан Galaxy S24 Ultra флагмани нархи эса камида $1300 дан бошланади. Смартфонлар савдосига 31 январдан старт берилади.

Смартфонларда заводда мутахассислар томонидан кучайтирилган махсус Snapdragon 8 Gen 3 чиплари ва Adreno 740 график процессорлари ўрнатилган. Телефонларда кўзда тутилган оператив хотира — 8 ёки 12 Гб, ички хотира — 256, 512 Гб ёки 1 Тб. Юқори юкланиш билан ишлаш учун оптималлаштирилган совитиш тизими кўзда тутилган.

Galaxy S24 ва Galaxy S24+ экрани — Dynamic AMOLED, тегишли равишда FHD+ ва QHD+ ечим, 6,1 дюйм ва 6,7 дюйм катталикда, Galaxy S24 Ultra экрани — 6,8 дюймли Dynamic AMOLED, силлиқ ишланган QHD+ ечимга эга. Қуёш нурида тасвир аниқ кўриниши учун 2600 нит ёрқинлик ва Vision Booster технологияси кўзда тутилган. Барча смартфонлар энг сўнгги русумдаги Corning Gorilla Armor ойна қопламаси ва IP68 (чанг ва намликдан) стандарти асосида ҳимояланган.

Galaxy S24 ва Galaxy S24+ смартфонларининг асосий камералар модули олдинги авлод (Galaxy S23)га нисбатан ўзгармади: объектив — 50 Мп, телеобъектив — 10 Мп ва кенг бурчакли объектив — 12 Мп, селфи-камераси — автофокусли ва 4K ёзувчи 12 Мп.

Galaxy S24 Ultra тўрт модулдан асосий камера (марказий) — 200 Мп, ултра кенг бурчакли камера — 12 Мп, шунингдек, икки телеобъектив — олдинги 10 Мп (уч карра зумли)ни сақлаб қолди ва янги — беш карра оптик зумли 50 Мп камерага эга бўлди. Тасвир сифатини яхшилаш сунъий интеллектга асосланган ProVisual Engine га юкланган, стабилизация, тунги суратга олиш тизимлари оптималлаштирилган, фото ва видеоларни таҳрирлаш имкониятлари кенгайтирилган.

Барча смартфонларда тезкор қувватлаш мавжуд: базавий модел Galaxy S24 да — 25 Вт, Galaxy S24+ ва Galaxy S24 Ultra — 45 Вт гача. Galaxy S24 ва Galaxy S24+ аккумуляторлари сиғими тегишли равишда 4000 мАс ва 4900 мАс гача кенгайтирилган. Galaxy S24 Ultra аккумулятори сиғими — 5000 мАсч. Қурилмалар симсиз ва тескари (бошқа қурилмаларни) қувватлаш технологияларига эга.

Янги смартфонларда асосий урғу сунъий интеллект технологияларига берилган. Live Translate опцияси телефон қўнғироқлари пайтида реал вақт тартибида икки томонлама овозли ва матнли таржима қилиш имкониятини бериб, 13 та тилни қўллайди. Смартфон тилни автомат тарзда аниқлаб, таржимани ишга туширади. Диктофонда Transcript Assist ёрдамчиси овозли ёзувларни ва матнга ўгириб беради. Google технологиялари ёрдамида қидирув яхшиланган, Samsung Knox ечими эса смартфонлар ҳимоясини янада кучайтиради.

Янги Samsung Galaxy S24 смартфонлари One UI 6.1 қобиғи ва Android 14 операцион тизимида сотувга чиқарилади — Galaxy S24 туркуми етти йил давомида — 2031 йилга қадар Android янгиланишларини олади.