Бирлашган Миллатлар Ташкилоти томонидан 3 декабрь – Халқаро ногиронлиги бўлган инсонлар куни этиб белгиланган. Бу кун нишонланишининг асосий мақсади – жамият ҳаётининг барча соҳаларида имконияти чекланган шахслар ҳуқуқларини рағбатлантириш, шунингдек, уларнинг муаммоларига кенг жамоатчилик эътиборини жалб қилишдан иборат.

Бугун, 3 декабрь куни Ахборот технологиялари ва коммуникацияларини ривожлантириш вазирлиги Халқ таълим вазирлиги ва Киберспорт ассоцияцияси билан биргаликда имконияти чекланган ёшлар учун бир кунлик киберспорт турнири ташкил этилди.

Тошкент шаҳридаги 100,101,102 ва 106-сонли ихтисослаштирилган мактаб-интернатларининг 200 дан ортиқ ўқувчилари “Fidanza” кибер аренасида йиғилишди ва бугунги кунни мароқ билан ўтказишди.

Ҳар бир ёш авлод борки, ўз ҳаётини компьютер ва гаджетларсиз тасаввур эта олмайди. Бугунги байрамда айнан киберспорт йўналиши танланганлиги барча ўқувчиларга бирдек манзур бўлди. Айниқса, ўз соҳасининг етук мутахассислари, яъни Олимпиада иштирокчиси, Осиё ўйинлари ғолиби Мўминжон Абдуллаев ҳамда ўз YouTube каналида минглаб мухлисларига эга “Yakudza” билан учрашишгани ёшларни янада руҳлантирди.