Tesla компаниясининг йирик бозорлардаги барча моделлари нархларини пасайтириш қарори электромобиль бозоридаги бошқа ўйинчиларнинг норозилигига сабаб бўлди. Кузатувчиларнинг қайд этишича, электромобиллар учун дунёдаги энг йирик бозор Хитойда ҳақиқий нарх уруши давом этмоқда.

Хитойда электромобиль стартапи бўлган XPeng компанияси ҳам ўзининг энг машҳур моделларининг нархини пасайтирди. 17 январдан бошлаб компаниянинг расмий веб-сайтида нархларнинг 13% гача бўлган оммавий арзонлашуви эълон қилинди.

Бренднинг энг кўп сотиладиган седани XPeng P7 ҳозирда 31 000 доллардан бошланади, бу аввалгидан 4 500 долларга арзон (12,5 фоизга). Xpeng G3i’и кроссоверининг бошланғич нархи 22 000 долларгача тушди, бу аввалгисига нисбатан 12 фоизга камайди.

Компаниянинг энг ҳамёнбоп седани XPeng P5 нархи ҳам 13 фоизга арзонлашиб, 23 200 долларга тушди. Яқинда тақдим этилган XPeng G9 флагман нархлари ўзгаришсиз қолмоқда.

XPeng’нинг таъкидлашича, нархларни пасайтириш унинг автомобилларини хитойлик харидорлар учун янада жозибадор қилади ва рақобатбардош қилади.

Tesla аввалроқ AҚШ, Хитой ва Европада нархларни пасайтирган эди. Эслатиб ўтамиз, январь ойи бошида юзлаб хитойлик Tesla эгалари нархлар кескин пасайганидан кейин чегирмалар талаб қилиб норозилик намойиши ўтказган эди.