Рақамли технологиялар вазирлиги IT Park Uzbekistan ва “GIZ” билан ҳамкорликда бутун Ўзбекистон бўйлаб рақамли трансформацияни жорий этишга бағишланган йиғилиш ўтказди.

“GIZ” бутун дунё бўйлаб барқарор ўсиш ва ривожланишни қўллаб-қувватлашга қаратилган мослаштирилган, иқтисодий жиҳатдан самарали ва натижадор хизматларни тақдим этади.

Вазирлик ва IT Park тақдимотларида Ўзбекистоннинг малакали ва ёш кадрлари учун кўплаб имкониятлар яратадиган барқарор АйТи-экотизимини шакллантириш лойиҳалари намойиш этилди.

Тадбирнинг асосий қисми кенг кўламли АйТи-хизматлар ва миллий даражадаги лойиҳаларни амалга оширишга ихтисослашган IT Park резиденти — “UZINFOCOM” компаниясига ташриф бўлди. Компания сунъий интеллект, бизнес жараёнларини автоматлаштириш ва маълумотлар таҳлилга асосланган ечимларни таклиф қилади, энг замонавий технологияларни қўллаган ҳолда ўз мижозлари учун ишончли ечимларни таъминлайди.

“GIZ” Марказий Осиё мамлакатларида соғлиқни сақлаш, қишлоқ хўжалиги ва ёшлар бандлиги соҳаларида амалга оширилган рақамли трансформация лойиҳасини тақдим этди. Ушбу ташаббуслар технологик ва иқтисодий тараққиётни илгари суриш учун халқаро тажриба ва инновацияларни жорий этиш муҳимлигини акс эттиради.

Аҳолиси 37 миллиондан ортиқ, уларнинг деярли 66 фоизи 30 ёшгача бўлган Ўзбекистон янги имкониятларни ўзлаштириш учун улкан салоҳиятга эга. Ушбу ҳамкорлик, айниқса, ёшлар учун кўплаб иш ўринлари яратиши, ўсиб бораётган рақамли иқтисодиёт шароитида уларнинг ривожланишига кўмаклашиши кутилмоқда.

“GIZ” тажрибаси ва Ўзбекистоннинг стратегик қарашлари туфайли мамлакат ўзининг рақамли мақсадларига эришиш йўлида дадил ҳаракат қилмоқда. Ушбу ҳамкорлик, шунингдек, узоқ муддатли рақамли ривожланиш учун мустаҳкам пойдевор яратиб, илғор жаҳон тажрибаларини жорий этишга ёрдам беради.