"Sony" компанияси меҳнат муносабатларида аёлларни камситиш айблови билан судга берилди. Шикоят жамоавий тус олган бўлиб, аёлларнинг бир гуруҳи ўз эътирозларини баён қилишган.

Масалан, компанияда 17 йилдан бери ишлаётган Мари Харрингтоннинг билдиришича, иш жойида аёлларга ҳурмат билан муносабатда бўлишмайди, устунлик эркак кадрларда яққол сезилади. Хотин-қизларга кераксиз ходимдек муомала қилинади.

Буни компанияда юқори лавозимларни эгаллаганларнинг 70 таси эркак, 4 тагинаси аёл эканлигидан ҳам билиш мумкин. Раҳбарлар томонидан аёлларнинг оилавий ҳолати муҳокама қилинади, эркаклардаги бу омил эса қизиқтирмайди.

Яқинда гендер тенглиги бўйича мажлис ўтказилган бўлиб, унинг ҳамма иштирокчилари эркаклардан таркиб топганини қандай изоҳлаш мумкин?!

Аввал ҳам шу масалада айблов бўлганида "Sony" эътирозларни асоссиз дея рад этганди, бу гал эса ҳеч қандай муносабат билдирмади.

Аёлларни камситиш ҳолатлари мавжудлигидан бошқа компаниялар ҳам танқид остига олинган. Activision Blizzard, Riot Games, Ubisoft, Blue Origin, Apple шулар жумласидандир.