Мамлакатимизнинг АйТи экспортида АҚШ биринчи рақамли савдо ҳамкоримиз эканлигини кўпчилик тасаввур қилиши қийин бўлса керак. Зеро, бу йил режа қилинган 300 млн доллардан ортиқ IT ва BPO экспорт хизматларининг ярмидан кўпи айнан АҚШ бозорига тўғри келади (бу фақат юридик шахсларники, фриланс хизматларини ҳам қўшса, ундан ҳам кўп бўлади).

АҚШдаги компаниялар ҳам ёқилғи нархлари ҳамда фоиз ставкалари ортаётган даврда ўз рақобатбардошлигини ва фойдасини ошириш мақсадида ўз харажатларини оптимизация қилишга ҳаракат қилади. Айнан шу жараёнда Ўзбекистонда дунёдаги анъанавий катта аутсорсинг давлатларидан кам бўлмаган имкониятлар борлиги ҳақида уларга кўпроқ маълумот беришимиз зарур.

Президентимиз томонидан Ўзбекистонни АйТи хабга айлантириш бўйича қатъий мақсад белгилаб берилгани, бунинг учун эса зарур шарт-шароитлар яратилаётгани ҳамда дунёнинг етакчи давлатлари билан очиқ ва ўзаро манфаатли ҳамкорлик йўлга қўйилгани натижасида мамлакатимиз 2017 йилда IT ва BPO расмий экспорти деярли йўқ бўлган давлатдан 2022 йилда 140 млн доллар IT ва BPO экспортига эга давлатга айланишига эришилди. Энди эса IT ва BPO хизматлар экспортини 2030 йилгача 5 миллард долларга етказиш бўйича жуда катта маррани белгилаб бердилар.

Бу ёшларимизга оилалари билан ўз юртларида яшаб, интернет орқали хизматлари ва маҳсулотларини чет элга экспорт қилиб, юқори даромад топиш имкониятларини янада кенгайтириши аниқ. Бунинг учун эса, энг асосийси, ёшларимиз интернетдаги вақтларини бекор ўтказмай, кўпроқ чет тиллари ва замонавий технологияларни ўрганишлари зарур.

Ёзда чет тиллари ва замонавий технологияларни бемалол ўрганиш учун жуда кўп ресурслар бор, жумладан:

http://education.it-park.uz
http://uzbekcoders.uz
http://it-istedod.uz
www.youtube.com/@milliy_talim_resurslar
www.youtube.com/@ibratfarzandlari