“IT-Woman” кўрсатувининг бугунги қаҳрамони Plug and Play компаниясининг партнёрлар билан ҳамкорлик менежери Раъно Сиддиқова.

— Анъанавий саволимиздан бошлаймиз. АйТи оламига кириб келишингиз қандай бўлган? Нима сабабдан айнан бу соҳани танлагансиз?

— Биласизми, мен АйТини эмас, АйТи мени танлаган, десам муболаға бўлмайди. Даставвал, Ucell компаниясининг маркетинг бўлимида иш бошлаганман. Кейин Адвантур компаниясининг АйТи бўлимини бошқарганман. Сўнгра АйТи компанияларнинг таклифи билан шу йўналишда ишимни давом эттирганман.

— Болаликдан нималарга қизиққансиз? Ҳоббингиз борми?

— Болалигимда диктор бўламан, деб орзу қилардим. Кейинчалик инглиз тилига қизиқишим ортиб борди. Аммо мен инглиз тилида дарс беришни эмас, балки шу тилда иш юритишни истардим. Ҳозирда ниятим амалга ошиб, ўзим истагандек инглиз тилида ишлаяпман.

— Қиз бола сифатида ушбу соҳани танлашингизга оила аъзоларингиз қандай фикр билдиришган?

— Оила аъзоларим касбим бўйича мени ҳамиша қўллаб-қувватлашган. Янги ишга кираётганимда ҳам ота-онамга аввалдан ишим кўп бўлишини айтганимда, улар буни тўғри қабул қилиб, ҳаттоки биздан нима ёрдам, деб қўллаб-қувватлашган. Муҳими, қилаётган ишим одамларга фойда беришини исташади.

— Шу ўринда соҳанинг аёллар учун афзалликлари ҳақида ҳам батафсил айтиб ўтинг…

— Айни дамда асосий ишимдан ташқари, аёлларга алоқадор Woman Techmakers амбассадориман. Шундан келиб чиқиб айтадиган бўлсам, АйТи соҳасининг аёллар учун афзалликлари талайгина бўлишига қарамай, негадир менталитетимизда АйТи — аёллар учун эмас, деган стреотип сақланиб қолган. Лекин шахсан ўзим АйТи соҳасининг вакили сифатида ишонч билан айта оламанки, АйТи — аёллар учун энг қулай соҳа. Айниқса, қиз бола турмушга чиққанидан сўнг кун бўйи ишлашга шароити бўлмаса ҳам хорижий тилларни ва ўз касбини яхши билса, дунёнинг исталган мамлакатидаги йирик компанияларда масофадан ишлаб, юқори даромад топиши мумкин. Шунингдек, АйТи — бу фақат дастурлаш, дегани эмас. Унинг йўналишлари жуда кўп. Шу боис ҳам ишни бошлаш ва давом эттириш ҳам бошқа соҳаларга қараганда анча осон.

— АйТига 3 та сўз билан таъриф… АйТи сиз учун нима?

— Янгилик, қулайлик ва шаффофлик!

— АйТи соҳасига кириш истагидаги ёшларга, қизларга тавсияларингиз...

— АйТи соҳасига кириш истагидаги ёшларга биринчи тавсиям — инглиз тилини ўрганинг! Чунки АйТининг имкониятлари жуда катта. Лекин улардан фойдаланиш учун биринчи навбатда инглиз тилини яхши билиш керак. Иккинчи тавсиям — қўрқмасдан савол беринг. Билмаганни сўраб ўрганиб, ўз фикрини эркин ифода эта олиш АйТи мутахассиси учун жуда муҳим сифатлардан бири десам, муболаға бўлмайди.

Эъзоза Турғунова суҳбатлашди